Иванов: Да изградиме лидери со вистински вредности и интегритет
Претседателот Иванов е во повеќедневна посета на Турција. На Светскиот форум „Бизнис ангели“ кој се одржува во Истанбул, Иванов со порака- да изградиме лидери со вистински вредности и интегритет. Шефот на државата, им порача на присутните да ги подготвуваат оние што доаѓаат по нив, да бидат личности со морални и етички вредности, за да можат да се соочуваат со предизвиците.
Само со отворен ум младите ќе можат да размислуваат надвор од шаблоните, да изнаоѓаат нови, иновативни решенија на патот до индивидуалниот и колкетивниот успех. Сакаме да изградиме лидери со вистински вредности и интегритет, истакна претседателот Ѓорге Иванов на Светскиот форум на бизнис ангели, што се одржува во Истанбул.
Посочувајќи ја Школата за млади лидери, чиј е основач, шефот на државата им порача на присутните да се вклучат кон овој потфат, преку инвестирање на своето знаење, време и финансии, во идните општествени лидери на Македонија, Балканот, Европа и светот. Наша одговорност е, вели Иванов, да ги подготвиме оние кои доаѓаат после нас, да бидат морални и етички лидери со карактер, интегритет, понизност, фокус на луѓето, одговорност, храбро и мудро да се соочуваат со предизвиците.
На форумот, бизнис фелата сподели мислења, ставови и искуства, истражувања. На исто место се спојуваат младите луѓе со квалитетни идеи и претприемачи, сопственици на старт- ап бизниси, каде со договараат со ангел инвеститор, да инвестираат во нивните бизнис проекти.
За прв пат на „Бизнис ангел“ настанот течат пет симултани самити за различни инвеститори- за претприемачи, за инструменти за финансирање, за социјално претприемништво и ИТ секторот.
Наташа Гркова- Петрушевска, специјален известувач од Истанбул за МРТ