Комисијата за заштита од дискриминација ги осуди содржините од збирката поезија „Млади поети“

Комисијата за заштита од дискриминација ги осуди содржините од збирката поезија од проектот „Млади поети“ финансирана од Агенцијата за млади и спорт. Објавените песни содржат елементи на дискриминација по основ на етничка, верска и родова припадност, стои во реакцијата на Комисијата.

Збирката поезија содржи форми на изразување кои не се прифатливи за едно демократско и мултикултурно општество, а во исто време се во директен судир со повеќе одредби од Законот за спречување и заштита од дискриминација, соопшти Комисијата.

Жири-комисија, пак, во состав Јовица Ивановски, Николина Андова-Шопова и Тихомир Јанчовски вчера соопшти дека се оградува од скандалозните содржини вклучени во збирката што ја издаде Агенцијата за млади и спорт.

Тие велат - Комисијата немаше обврска да прави селекција на пристигнатите песни за книгата, а со оглед на тоа што од песните што ни беа дадени на разгледување, некаде околу 80, се објавени само 44, значи дека некој сепак направил селекција. Решението што на прес - конференцијата го прочита директорот на Агенцијата за млади и спорт, нам, никој, во ниту една пригода не ни го презентираше или достави. Додаваат дека авторските дела биле потпишани со шифра и немале увид во идентитетот на авторите.

Опозициската ВМРО-ДПМНЕ смета дека директорот на Агенцијата за млади и спорт Дарко Каевски треба да си даде остава понесувајќи одговорност за, како што велат, скандалот со збирката поезија.