Курц ги повика граѓаните да гласаат „ЗА“ на референдумот
Протоколарен пропуст со австриското знаме на пречекот на канцеларот Курц, на платото пред македонската Влада. Поставено латвиското, наместо австриското знаме. Владата се извини за гафот. И покрај ова, силна порака од претседавачот со ЕУ. Канцеларот Курц порача, Македонија е пријател на Австрија, и би сакале граѓаните да излезат на референдумот...

„Би сакал што повеќе граѓани да излезат на референдумот и да гласаат ЗА“. Австрискиот канцелар, Себастијан Курц во Скопје. Неговиот став е дека гласањето на 30-ти септември е одлука на граѓаните. Советуваше дека би било добро да има излезност. За ставот на ВМРО-ДПМНЕ за референдумот, рече дека има иста порака и за народот, и за опозицијата и за власта.
„Австрија е број еден инвеститор во Македонија. Европската унија ќе биде комплетна кога целиот Западен Балкан ќе се интегрира. Тоа е избор за секој граѓанин, но како пријател на Македонија мислам дека е добро доколку има голема излезност“, изјави австрискиот канцелар, Себастијан Курц.
Премиерот Заев благодарен на австриската поддршка. Рече оти Македонија ќе биде позитивен пример за мир и стабилност во регионот.
„Поттик за нас е што Австрија ја препозна Македонија како надеж за Европа. Ова го прифаќаме како обврска. Вашата посета е силна порака во пресрет на референдумот и јас верувам дека мнозинството граѓани ќе го дадат својот глас за иднина“, нагласи премиерот Заев.
Австрискиот канцелар беше дочекан свечено. На платото пред владата освен премиерот, и почесната гарда му посака добредојде на гостинот. Но, наместо австриското, беше поставено латвиско знаме. Владата со извинување, за како што велат, ненамерниот протоколарен пропуст.
„Пропустот е направен од страна на службите за протокол на Владата на Република Македонија и на Министерството за надворешни работи, а до него дошло поради големата сличност во димензиите и колоритот на знамињата на Австрија и Латвија“, се вели во владиниот допис.
Посетата на Курц е по покана на македонскиот премиер. Доаѓа по средбите во Скопје на генералниот секретар на НАТО, Јенс Столтенберг и во пресрет на утрешната, на германската канцеларка Ангела Меркел.
Катерина Топалова
