Политика

ВМРО-ДПМНЕ: Барањето на СЈО и одлуката на судот се од политички мотиви

01.11.2018 14:23

По барање на Специјалното јавно обвинителство, судија на претходна постапка на скопскиот Кривичен суд, донесе решение за времена мерка за замрзнување на имот на ВМРО-ДПМНЕ. Реакција од опозициската партија - барањето на СЈО и одлуката на судиите се исклучиво од политички мотиви...

Со времената мерка на судија на предходна постапка во скопска единица, на барање на СЈО, се замрзнати 69 недвижнини, меѓу кои и објектот во кој се наоѓа седиштето на опозициската ВМРО-ДПМНЕ. Се забранува негово отуѓување и давање под закуп. Дејствијата се преземени во рамки на предметот „Талир“, бидејќи има сомнежи дека може да биде отуѓен до завршување на постапката, информираат од СЈО. Во „Талир“ осомничени се 14 лица, меѓу нив и екс лидерот на ВМРО-ДПМНЕ, Никола Груевски.

Експресна реакција од ВМРО-ДПМНЕ. Единствениот аболициран политичар Зоран Заев знае дека ВМРО-ДПМНЕ е последниот бедем во заштита на државните и национални интереси и не бира средства со кои што ќе си обезбеди бришан простор за реализација на распродажбата на сѐ што е македонско. Затоа Заев реши да го направи и последниот чекор и да го искористи партиското Специјално јавно обвинителство, изјави генералниот секретар на партијата, Јанушев.

„Од авион се гледа дека ова е случај на класичен политички прогон и невидено политичко насилство со кое што директно се задира во правата на граѓаните да се организираат и да делуваат. Ова е класична злоупотреба на институциите и правосудниот систем во исполнување на политичката агенда на Заев. Затоа ВМРО-ДПМНЕ бара под итно да се укине решението за привремената мерка донесена во текот на вчерашниот ден, како неосновано и недозволено. За овој политички прогон ВМРО-ДПМНЕ ќе ги информира меѓународните претставници во земјава и нашите сестрински партии“, изајви Јанушев.

Во ВМРО-ДПМНЕ тврдат дека барањето на СЈО и одлуката на судот за замрзнување на имотот се целосно неосновани и без аргументација. СЈО нема мандат за барање привремена мерка, а ВМРО-ДПМНЕ воопшто не е осомничено правно лице во постапката „Талир“. Оттаму, велат во ВМРО-ДПМНЕ, сето ова не ништо друго туку политички прогон.

 

Миле Ристески