Фити: Во Бугарската академија има членови што не се согласуваат со ставот дека македонскиот јазик не постои
Според првиот човек на МАНУ, во оваа одлука е инволвирана политиката и вели тоа нема да ги наруши односите меѓу двете академии.
Во Бугарската академија има членови што не се согласуваат со ставот дека македонскиот јазик не постои и оти тој е „писмено- регионална норма“ на бугарскиот јазик, вели претседателот на МАНУ Таки Фити. Според него, во оваа одлука е инволвирана политиката и вели тоа нема да ги наруши односите меѓу двете академии.
„Ние имаме одлични односи со БАН. Излезе тој документ каков што излезе, но јас имам и други информации, дека баш сите академици на БАН не го поддржале тоа. Тука е инволвирана бугарската државна политика, што не е во ред. Поради тоа нема да ги расипеме односите“, рече претседателот на МАНУ, Таки Фити.
Поттикнати од објавувањето на „Повелба за македонскиот јазик“ на МАНУ, објавена на 3-ти декември, Бугарската академија одржала вонредна седница на која дошло до едногласен заклучок дека македонскиот јазик не постои, туку е писмено-регионална норма на бугарскиот јазик.