Финансиска поддршка за организирање на агро- саеми и манифестации
На локалните самоуправи, земјоделските здруженија и стопански комори им остануваат уште неколку денови за да се пријавуваат за финансиска поддршка за организирање на агро- саеми и манифестации. Рокот за пријавување ќе трае до 28-ми февруари. Еден корисник може да добие до 2.000 евра.
До крајот на неделава можат да се поднесуваат документите на огласот објавен од јануари годинава, за финансирање на организирање и спроведување на саеми и на локални манифестации за промоција на земјоделски производи.
Право на учество на јавниот повик имаат единиците на локалната самоуправа, здруженија од областа на земјоделството, руралниот развој, стопански комори и задруги.
Барателите треба да достават план на активности со временска рамка за реализација на предлогот , методологија за нивна реализација, финансиски план и извори на финансирање.
Максималниот износ за еден барател е до 120.000 денари по саем или манифестација.
За реализацијата, корисниците треба да спроведат постапка за јавна набавка, а во рок од десет дена по завршување на настанот, односно промоцијата треба да изготват извештај за реализираните активности.
Краен рок за поднесување апликациите е до 28-ми февруари 2020 година.
Методија Трајков