Какви грешки правеле матичните лекари, специјалистите и болниците во 2013-та?!

Лани контролорите на Фондот за здравствено осигурување направиле вкупно 4578 контроли. Од нив најмногу,односно 4048 биле на примарно ниво,односно кај матичните лекари. Според извештајот на Фондот,во минатата година се утврдени многу неправилности при работењето. Дел од матичните лекари им наплаќале партиципација на пациентите, што не е во согласност со законските прописи и грешка која се повторува со години. За жал, дел од пациентите се неинформирани, некои сметале дека немаат друг избор и не сакале да се замерат со својот доктор,а некои не можеле да го докажат бидејќи немале фискални сметки. На осигурени лица за одредени услуги ,особено во гинекологијата, им наплатувале и дополнителни средства, за наводни трошоци.Некои матични лекари работеле  во иста смена како и нивната замена, со што не им обезбедувале континуирана здравствена заштита и достапност до лекар на своите пациенти во текот на целиот ден.Во одредени  ординации од примарно ниво, работеле доктори специјалисти кои наплатувале за своите специјалистичко консултативни услуги. Неовластени лица ги користеле факсимилите  на лекари што имаат склучено договор со Фондот. Контролите на Фондот откриле и неуредно водење на медицинска документација, како здравствени картони, амбулантски дневник и компјутерска евиденција. Многу ординации во моментот на контролата не поседувале соодветна задолжителна ургентна ампуларна терапија како на пр. антишок, а немале ниту боци со кислород. Имало и неправилности во врска со изборот на матичен лекар.

Од 530 извршени контроли, пак, во специјалистичко консултативните ординации контролорите откриле дека лекарите пропишувале потврди за ортопедски помагала надвор од условите за остварување права утврдени во Правилникот. Некои фактурирале несоодветни пакети услуги, подметнувајќи и такви кои не спаѓаат во договореното. И тука се злоупотребувале факсимилите. И таму се водела неуредна медицинска документација и се наплатувала повисока партиципација од утврдената.

И во болниците им земале повеќе пари за партиципација, па имало многу барања од пациентите за рефундирање на парите. Им наплаќале приватно на осигурениците за услуги што не спаѓале во утврдениот пакет услуги според ДРГ(дијагностички сродни групи). Им наплаќале на пациентите за издавање конзилијарни мислења. Некои пациенти дури се пожалиле дека сакаат два пати да им ја наплатат услугата, еднаш приватно, еднаш како осигуреник заради погрешно кодирање на пациентите кој во која категорија спаѓа. На една скопска клиника контролата покажала дека пациентот сам си го купил неопходниот  медицински материјал, па барал рефундација. Но тоа не е единствен пример.Пријавени или не, фатени или не, поголемиот дел од болниците работат на овој принцип неможејќи да ги набават сите потребни материјали поради ограничените буџети.

Соња Стојановска