Измените на Законот за заштита на населението од заразни болести пред пратениците

Измените и дополнувањата на Законот за заштита на населението од заразни болести денеска се пред пратениците во рамки на 19-та седница на законодавниот дом. Измените се во насока на спречување на ширењето на коронавирусот без воведување ригорозни мерки како што е полициски час.

Законот за заштита на населението од заразни болести е во собраниска процедура и верувам дека сите пратеници, свесни за тежината на ситуацијата во која се наоѓаме, брзо ќе го изгласаат. Во овој момент сметаме дека дополнителен пакет и некоја друга форма на мерки не треба да се имплеметираат, ниту да се препорачуваат. Верувам дека законот ќе се донесе за да избегнеме полициски час. И тоа се мерки кои практично имитираат полициски час. По 23 часот ништо нема да работи и граѓаните нема каде да одат, изјави вчера министерот за здравство, Венко Филипче.

Целта е, напомена, да се избегне групирањето и да се носат маски.

Доволно е да се почитуваат мерките за заштита и оние мерки кои ќе бидат изгласани во Парламентот. Генерално препораката е да се избегнува воведување полициски час. И на состанокот кој го имавме преку Берлинскиот процес со сите земји во регионот, беше порачано да нема такво ограничување. А пакет мерки кои можат да имитираат полициски час се речиси секаде во сила, нагласи Филипче.

Пратеничката група на ВМРО-ДПМНЕ и коалицијата „Обнова на Македонија“ заедно со останатите опозициски партии Алијанса и Алтернатива и Левица, вчера поднесоа Предлог-закон за дополнување на Законот за заштита на населението од заразни болести по скратена постапка со кој бараат формирање посебна комисија за заштита и справување со пандемија или епидемија која ќе биде формирана од страна на Собранието и ќе треба да придонесе за ставање под контрола на ковид-ситуацијата.