Штип: Сѐ е подготвено за изборите за градоначалник
До сабота, 7-ми ноември ќе бидат познати кандидатите за градоначалник на Штип. Кој ќе биде изборот пред штипјани, партиите не откриваат, извесна за сега е кандидатурата на независниот кандидат Трајче Митев. Опозицијата деновиве ќе одлучува дали да оди на избори. Во Штип ќе се бира градоначалник заради тоа што досегашниот, Благој Бочварски, стана Министер за транспорт и врски.
Општинската изборна комисија во Штип е подготвена за изборите за градоначалник кои треба да се одржат на 13-ти декември. Подготвени се 77 гласачки места, каде ќе можат да гласаат околу 40 илјади лица. Порастот на заразени и лица во изолација, засега не ја попречува работата на Општинската изборна кмисија.
До денес никој нема доставено канидатура за градоначалник до ОИК, крајниот рок е до сабота, 7-ми ноември. ВМРО ДПМНЕ на седница на Извршен комитет неделава ќе одлучува дали ќе учествува на изборите со оглед на состојбата со корона вирусот. Во прашање се околу десет месеци до редовните локални избори, зошто да се ризикува здравјето на предвремени, велат штипјани.
Досега штипјани никогаш не избреле градоначалник во првиот круг. Вториот круг на гласање се планира на 27-ми декември.
Славица Величковска