Се намалува бројот на новозаразени со Ковид-19

Се намалува бројот на новозаболени и на починати од коронавирусот во земјава – покажува неделниот извештај на Институтот за јавно здравје.  Потврдени биле 3.372 позитивни случаи или за 26,5 проценти помалку од претходната седмица. Помал е бројот и на починати како последица на ковид. Регистрирани биле 129 смртни случаи, што е пад од речиси 19 насто.

Претстојните празници се нов предизвик во битката со пандемијата. Во кафеаните и во баровите нема да се прославува, властите повикаа граѓаните да не се собираат во домовите. Лекарите со апел да се почитуваат мерките.

И натаму најзастапена е возрасната група од над 60 години, кај нив и смртноста е најголема. Поголем број на заболени има и кај луѓето од 30 до 39 години. Во изминатите седум дена направени биле 13.123 тестирања, а процентот на позитивни од тестирани е 25,7 проценти.

Во изминативе девет месеци, битката со коронавирусот ја загубија околу 2.500 граѓани. Од околу 82 илјади заразени досега, бројот на активни случаи падна под 20 илјади.

Андријана Атанасовска