Филипче: Да не се компромитира процесот за набавка на вакцини со измислени афери

Министерството за здравство набавката на вакцини против Ковид 19 ја врши на законски начин, почитувајќи ги начелата во договорите за набавка на вакцините на самите производители. Лажните обвинувања без никакви докази за наводни провизии или нерегуларни постапки само ја потврдуваат заложбата и напорите на Владата и Министерството за здравство да обезбедат вакцини што побрзо за граѓаните. При комуникацијата за набавка на 200.000 кинески ванкцини од Синофарм, не е направена каква било нерегуларност, туку некој свесно се обидува да го поткопа целиот процес на имунизација, истакна денеска на пресконференција министерот за здравство Филипче.

„Не станува збор за ништо незаконско, за ништо нерегуларно, не станува збор за некави провизии за што овие денови нѐ обвинува опозицијата“, нагласи Филипче.

Објавените писма од Ла Верита се писма за намера какви што Министерството за здравство има испратено до многу компании,кои помагаат или посредуваат за набавка на вакцини против Ковид- 19. Вакви писма и комуникации владата има со компании од САД, Австрија и други земји.

На ист начин е обидот да се набават вакцини и од „Синофарм“. Од самиот почеток нашата земја ги почитува сите процедури за набавка на вакцини и со овој производител- велат од Министерството за здравство.