САД

Бајден: Замрзнување на имот и забрана за влез во САД на лица кои работат против Преспанскиот и Охридскиот договор

09.06.2021 12:13

Секое лице кое директно или индиректно го спречува или е закана за спроведувањето на Охридскиот рамковен договор или за Преспанскиот договор, ќе се најде на црната листа на САД. Бајден потпиша извршна наредба за замрзнување на имот и забрана за влез во САД на лица кои ги поткoпуваат мирот и стабилноста на Западниот Балкан...

Американскиот претседател Џо Бајден потпиша извршна наредба за замрзнување на имот и забрана за влез во САД на лица кои работат против Преспанскиот и Охридскиот рамковен договор, нивното спроведување, и ги поткoпуваат мирот и стабилноста на Западниот Балкан.

„Одговорност за кршење или опструкција на регионалната безбедност и мир поврзана со Западен Балкан, вклучувајќи го Преспанскиот договор, Охридскиот рамковен договор, Резолуцијата 1244 на ООН и Договорот од Дејтон“- соопшти американскиот претседател, Бајден.

Бајден го задолжи секретарот за финансии на САД да ги определи имињата на поединците и компаниите кои ги нарушуваат или ќе ги нарушат меѓународните документи. Забраната би се стоела во замрзнување на фондови, добра, имоти или услуги на лица и фирми во САД, и забрана за влез за што е задолжено Министерството за внатрешна безбедност. На ова се надоврзува и државниот секретар Блинкен кој побара зголемено справување со корупцијата во државите од Западен Балкан.

„САД потврдува дека корупцијата им се заканува на компаниите, на борбата против сиромаштијата и воопшто на демократијата. Затоа сме посветени во промоцијата на одговорност и на битката против неказливоста за оние кои се вклучени во значителната корупција на Западен Балкан“, вели државниот секретар, Блинкен.

Укажува дека САД веќе презеле мерки против шест бугарски функционери и бизнисмени за нелегално издавање на бугарски пасоши.

 

Ирина Гелевска