Претседателот на Република Македонија Ѓорге Иванов денеска оствари средба со амбасадорот Самуел Жбогар, шеф на делегацијата на Европската унија во Република Македонија.
На средбата се разговараше за актуелната политичка ситуација во земјата, соопшти Кабинетот на претседателот.
Треба да се остави простор за дополнителни консултации во политичките партии за да се формира стабилна Влада- став на аналитичари откако не се постигна договор меѓу ВМРО-ДПМНЕ и ДУИ за ново парламентарно мнозининство.
Регистриран е првиот случај на птичји грип во земјава. Лабораториски е потврден во струшкото село мороишта. Од жариштето е уништена и отстранета живината, направена е дезинфекција. Ќе се уништува и преостанатата живина во селото, тимови од агенцијата за храна и ветеринарство се на терен.
Очекувам Ѓорге Иванов да ми го додели мандатот за формирање нова влада. Сите поинакви опции ќе значат кршење на Уставот и злоупотреба на функцијата- изјави лидерот на Социјал-демократите Зоран Заев, кој смета дека ќе успее да обезбеди мнозинство во Парламентот и да формира Влада.
Утре во Македонија се очекува променливо облачно време со повремени сончеви периоди, а кон крајот на денот во делови од земјава ќе има услови за провејување на слаб снег.
Европската Унија очекува претседателот Иванов да ги повика на итна консултација сите политички партии и да определи кој ќе формира широка и стабилна Влада- ова е пораката која денеска во име на ЕК ја испрати портпаролката Маја Коцијанчич.
Почна екстерното тестирање за 18.600 матуранти. Тестирањето ќе трае до крајот на оваа недела, а прелиминарните резултати ќе бидат објавени на 7-ми февруари.
Учениците кои ги анкетиравме велат дека немале проблем, прашањата ги добиле навреме.
Очекувам Иванов да ми го додели мандатот, откако вчеравечер ВМРО-ДПМНЕ не успеа да состави Влада, изјави на денешната конференција за новинарите лидерот на СДСМ, Зоран Заев. Демократските процеси се почнати, тврди Заев.
По добивање официјално известување од Собранието на Република Македонија, дали мандатарот има поднесено програма и предлог за состав на нова Влада, претседателот Ѓорге Иванов ќе почне консултации со надлежните институции и политичките партии, велат за МИА од Кабинетот на шефот на државата.
Бараме одговорност од сите субјекти во земјата. Ова на денешната прес конференција во Брисел го изјави портпаролката на Европската комисија, Маја Коцијанчич.
