Германската полиција денеска почна акции против осомничени исламски екстремисти во неколку градови во провинцијата Северна Рајна- Вестфалија.
Извршен е претрес во домови и објекти на осомничени лица во градовите Дуисбург, Дортмунд, Диселдорф и Тонисфорст.
Единаесет новороденчиња загинаа во пожар што избувна синоќа во болница во Багдад. Огнената стихија го зафатила гинеколошко-акушерскиот оддел на болницата „Јармук“ во западниот дел на Багдад.
Според првичните податоци, причина за пожарот е куса врска во електричната инсталација.
На неколку острови во спорното Јужнокинеско Море, Виетнам тајно распоредил нови ракетни системи, способни да погодат цели и воени објекти во Кина.
Бразилскиот сенат по повеќе од 15 часа дискусија изгласа продолжување на процедурата за импичмент на Дилма Русеф, која беше времено отстранета од претседателската функција по обвинение за финансиски малверзации.
Четворица маскирани разбојници вооружени со автоматски пушки и пиштоли ограбиле филијала на банката „Пиреја“ во Атина, при што како заложници цели два часа држеле осуммина вработени и пет клиенти.
Три лица беа полесно повредени синоќа при напад врз автобус со новинари, кои известуваат од Олимписките игри во Рио. Повредените се новинари од Турција, Аргентина и Белорусија. Во нападот биле искршени и неколку прозорци на автобусот.
Над 26 илјади луѓе се приведени во врска со обидот за пуч во Турција, од нив 16 илјади се задржани во притвор, соопшти турскиот министер за правда Бекир Боздаг.
Меѓународниот суд на Косово осуди поранешен член на ОВК на осум години затвор за воени злосторства против цивили.
Обединетите Нации повикаа на итен прекин на борбите во реонот на Алепо во северна Сирија за да се достави хуманитарна помош. Се проценува дека повеќе од два милиона луѓе се без струја и вода.
Во напад на турските воздушни сили врз позиции на курдските бунтовници на југоистокот од Турција загинале 13 курдски борци.
Нападот бил изведен во неделата по безбедносна дојава дека членови на Работничката партија на Курдистан делуваат во околината на провинцијата Сирт.
