Утре во Македонија ќе преовладува сончево и топло време со умерена облачност.
Кон крајот на денот се очекува зголемување на облачноста со услови за локална појава на краткотрајни врнежи и ретки грмежи особено во северните делови.
Поизраезена нестабилност ќе настапи во четврток.
И денеска привремената комисија за следење на медиумското изборно претставување без договор за избор на петтиот член. Неизвесно е дали до утре за кога е најавена лидерска средба ќе се најде решение, откако еден од кандидатите Даут Даути се откажа од трката.
Во Радишани отворена нова градинка со капацитет да згрижи 120 деца од предучилишна возраст. Покрај петте занимални, има и медицинска соба за првично згрижување болни деца.
Илчо Даскалоски од прилепско Мало Коњари е еден од најпродуктивните земјоделци во пелагониско. Со системот капка по капка и со напредните течни ѓубрива двојно ги зголеми приносите на силажна пченка и ги намали трошоците на производство, обезбедувајќи ја храната за добитокот.
Според последните податоци на Државниот завод за статистика, индустриското производство во периодот од јануари до јули годинава забележа раст од 5,6%. Податоците покажуваат раст на индустриското производство од 5,1% и за јули 2016-та година во споредба со јули 2015-та.
Првпат доаѓа во Македонија и воопшто на Балканот, добитникот на Златниот венец, канадската поетеса Маргарет Атвуд, ги искажа своети импресии од учеството на Струшките вечери на поезијата. Вели да се чита поезија на својот мајчин јазик е прекрасно чувство.
Пред да чукне ѕвончето за старт, се прават последните подготовки. Најраздвижено е во училиштата кои пред неполн месец беа поплавени. Со помош на општината и на невладините, 1.438 ученици во „25 мај“ ќе ги имаат сите услови за настава во новата учебна година, вели директорот.
Судиите, министрите и пратенците се најкорупирани, а секој трет граѓанин се соочил со барање за поткуп, покажува извештајот на Центарот за меѓународна соработка.
Потпишан договор меѓу министерството за локална самоуправа и УНДП вреден 330 илјади евра за санирање на најкритичните точки на браните на реката Пена во Полошкиот регион. Во првата фаза министерството од буџетот одвои 200 илјади евра.
Во јавноста протече радиска комуникација во која се откриваат планови за напад врз авионот на турскиот претседател Реџеп Таип Ердоган на денот кога беше извршен обидот за воен удар. Според транскриптот, пилотите кои учествувале во пучот на 15 јули планирале да го соборат претседателскиот авион.
