Повеќе од 600 домови изгореа во пожарот кој неколку дена беснее во Калифорнија. Властите прогласија вонредна состојба, а евакуирани се 13.000 луѓе.
Во справувањето со огнената стихија се ангажирани 2.300 пожарникари, од кои неколкумина се со сериозни изгореници.
Претседателот Владимир Путин е отворен за средба со американскиот претседател Барак Обама кога овој месец ќе престојува во Њујорк на годинашното заседание на генералното собрание на Обединетите нации, соопшти официјална Москва.
Европа не треба само да ги прифаќа бегалците, треба да се решат примарните причини за проблемот, ако навистина сте загрижени за бегалците престанете да ги поддржувате терористите, изјави сирискиот претседател Башар Ал Асад во интервју за руска телевизија.
Нова рута на бегалците, откако Унгарија им ги затвори вратите. Илјадници луѓе од Србија почнаа да транзитираат низ Хрватска, на патот до западноевропските земји. Медиумите во Хрватска соопштуваат дека бегалците не ја минуваат границата на легалните премини, туку преку споредни патишта.
Бегалската криза во Европа била една од темите на разговорот на српскиот премиер Александар Вучиќ со американскиот потпретседател Џо Бајден во Белата куќа. Вучиќ истакнал дека земјите од регионот им помагаат на бегалците од хуманитарни причини.
Со војска, полиција, ограда и затварање на воздушниот простор долж границата со Србија, во Унгарија од полноќ стапи во сила законот со кој се предвидува контрола на границата и закана од затворска казна од три до пет години за илегално минување.
Се уште е неизвесно дали Грција ќе формира нова влада по вонредните избори во неделата. Неизвесноста е поради изедначеноста на двете најголеми политички партии и нивните лидери одбиваат коалиција.
Најмалку 22 бегалци, меѓу кои и 4 деца се удавиле утрото во водите на југозападна Турција откако потонал бродот со кој сакале да стигнат на грчкиот остров Кос.
Полицијата во Лајпциг со солзавец и гумени палки го растури редовниот неделен протест на антиисламската организација Пегида на кој учествуваа околу 500 лица.
Портпаролот на Пентагон, Џеф Дејвис изјави дека неодамнешните потези на Русија во близина на сириското пристаниште Латакија укажуваат на тоа дека Москва планира на оваа локација да гради воздухопловна воена база.
